विराटनगर । विराटनगरमा राधाकृष्ण रथयात्रा भदौ ११ गते मंगलबार निकालिने भएको छ।

विराटनगर–१ पानीटंकीस्थित श्रीराधाकृष्ण मन्दिर परिषरमा बिहीबार पत्रकार सम्मेलन गर्दै रथयात्रा समारोह समितिले रथयात्राको ९३ औँ संस्करणको तयारी अन्तिम चरणमा पुगेको जनाएको छ।

पत्रकार सम्मेलनका क्रममा समितिका अध्यक्ष कैलाश रेग्मीले रथयात्रा अपराह्न करिब साढे ३ बजे निकालिने तयारी रहेको जानकारी दिनुभयो । विगतभन्दा फरक र भव्य रथयात्रा बनाउने तयारीमा समिति रहेको बताएका अध्यक्ष रेग्मीले रथयात्राका क्रममा विराटनगर आसपास र भारतीय क्षेत्रबाट करिब ५ लाख श्रद्धालु भक्तजनको सहभागिता रहने अपेक्षा गरेको बताउनुभयो ।

समितिका सचिव कृष्ण कार्कीले अपराह्न सुरु हुने रथयात्राले विराटनगरको मुख्यस्थानलाई परिक्रमा गर्न ६ घण्टाको समयभित्र ९ किलोमिटरको दूरी पूरा गर्ने जानकारी दिनुभयो । उहाँले भन्नुभयो  ‘विराटनगरको ९ किलोमिटर यात्राका क्रममा रथलाई विभिन्न स्थानमा ४३ पटक विश्राम दिइनेछ। सो क्रममा करिब ६० वटा विभिन्न प्रकारका सांस्कृतिक झाँकी पनि रहने छन्। विराटनगरको प्रतिष्ठासँग जोडिएको रथयात्रालाई सफल बनाउन सबै सुरक्षित भएर लाग्नुपर्छ।’

रथको डोरी छोयो भने मोक्ष प्राप्त हुने र मनोकामना पूरा हुने जनविश्वास रहेको बताएका समितिका उपाध्यक्ष नन्दकिशोर राठीले श्रद्धालु भक्तजनलाई रथयात्रा तान्न र पूजा गर्नका लागि सहज व्यवस्था बनाइने बताउनुभयो। विगतभन्दा फरक शैलीमा रथयात्रा अघि बढाउने बताएका उपाध्यक्ष राठीले यसपटक रथयात्रामा व्यावसायिक प्रचारप्रसारको गतिविधिमा रोक लगाइने उल्लेख गरेको छ ।

रथयात्राका क्रममा अत्याधिक भीडभाड हुने हुँदा भक्तजनहरुलाई गरगहना तथा आभूषण नलगाइकन रथायात्रामा सहभागिता जनाउन अनुरोध गरेको छ।