विराटनगर । विराटनगर ११ स्थित जनपथ टोलमा निर्मित गोल्डेन अस्पतालको नयाँ भवन उद्घाटन भएको छ । आज कोशी प्रदेशका मुख्यमन्त्री हिक्मतकुमार कार्कीको उपस्थितिमा भवनको उद्घाटन गरिएको हो ।

विराटनगरको हस्पिटल चोकबाट संचालन हुँदै आएको गोल्डेनले अब भने आफ्नै भवनबाट सेवा दिने भएको हो । करिब ४८ करोड लागतमा सुबिधासम्पन्न भवन निर्माण गरेको अस्पतालले केही समय पुरानो ठाउँबाट पनि सेवा संचालन गरिने अस्पतालका प्रबन्ध निर्देशक डा. श्यामकुमार रौनियारले जानकारी दिनुभयो ।
१५ शय्याबाट सेवा सुरु गरेको गोल्डेनले नयाँ भवनबाट भने सय शय्याको सेवा प्रदान गर्ने छ । उद्घाटन कार्यक्रममा बोल्दै मुख्यमन्त्री कार्कीले विराटनगर नेपालको स्वास्थ्य क्षेत्रमा अग्र स्थानमा रहेको बताबताउनुभयो ।

उहाँले भन्नुभयो , ‘मुलुकको स्वास्थ्य सेवा महंगो बन्दै गइरहेको छ । यसको मारमा विपन्न वर्गलाई परिरहेको छ । विपन्नले स्वास्थ्य सेवा पाउन पनि मुस्किल भइरहेको छ । यसको अन्त्य हुन आवश्यक छ ।’ उहाँले सबै जनताले सरल र सहज हिसावले स्वास्थ्य सेवा पाउन आवश्यक रहेको उल्लेख गर्नुभयो ।
पूर्वमन्त्री शिवकुमार मण्डलले स्वास्थ्य र शैक्षिक क्षेत्रले विराटनगरको अर्थ व्यवस्था चलायमान भएको उल्लेख गर्नुभयो । स्वास्थ्य उपचारका नाममा नेपाली पैसा भारतमा गइरहेको अवस्थामा यँही सुबिधासम्पन्न अस्पताल भएको खण्डमा नेपाली पैसा नबाहीरिने बताउनुभयो । उहाँले आर्थिक अवस्थालाई बुझेर सबैले सहज र सरल स्वास्थ्य सेवा पाउने व्यवस्था मिलाउन आवश्यक रहेको बताउनुभयो ।

उहाँले विपन्नलाई पनि सहज सेवा दिएर मानवीय सेवा गर्न पनि अस्पतालहरू चुकिरहेकाले यसको अन्त्य हुन आवश्यक रहेको बताउनुभयो ।
कोशी प्रदेशका पूर्व सामाजिक विकास मन्त्री जीवन घिमिरेले विराटनगर शिक्षा र स्वास्थ्य क्षेत्रको हब बन्दै गएको बताउनुभयो । उहाँले सबै किसिमका स्वास्थ्य सेवामा नेपालका डाक्टर र हस्पिटल अब्बल छन् भन्ने दृष्टान्त दिनेगरी गोल्डेनले काम गर्नुपर्नेमा जोड दिए । उनले भने, ‘आँखाको उपचारका लागि विराटनगरमा भारतलगायतका स्थानबाट आउँछन् । अन्य स्वास्थ्य सेवामा पनि यस्तै बनाउन आवश्यक छ ।’