डुमरलाल मेहता बिहिबार, आश्विन १८, २०८०
विराटनगर । महिलाहरूको महान् जितिया पर्व सुरु भएको छ । बिहीबार तथा आज देखि सुरु भएको जितीया पर्वको अवसरमा सुनसरीको देवानगञ्ज गाउँपालिका वडा नं.६ मा रहेको जितवाहान बाबा मेला समितीले आज झाँकी सहितको कलश यात्रा निकालेको छ ।
जितवाहन बाबा मेला समितीको आयोजनामा आज सयौँ व्रतालु र स्थानियहरुको सहभागितामा निकालेको कलश यात्रा जितवाहन बाबा मन्दिरबाट कलश लिएर देवानगञ्ज र बर्जु गाउापालिकाको सिमानामा रहेको बुढी खोलामा गएर र कलशमा जल भरेर पुन मन्दिर आएर कलश राखेको बताउनुभयो । भोली सोही स्थानमा कथा प्रवचन समेत हुने आयोजकले जानकारी दिनुभयो ।
यो पर्व तराईमा बसोबास गर्ने महिलाहरू तथा थारु महिलाहरूले धूमधामसँग मनाउने गर्छन् । व्रतालु महिलाहरूले सन्तानको दीर्घायुको लागि यो पर्व मनाउने चलन छ ।
यो पर्व ठाउँ अनुसार फरक फरक तरिकाले मनाइन्छ । आश्विन कृष्ण पक्षको सप्तमी, अष्टमी र नवमी तिथिमा तीन दिन यो पर्व मनाइन्छ । सप्तमीको दिनलाई ‘नहाए खाएके’, अष्टमीको दिनलाई ‘उपवास’ र नवमीको दिनलाई ‘पारन’ भनर मनाइने जितिया पर्वमा सप्तमीका दिन बिहान व्रतालुहरू नजिकको खोला–नदीमा गई तोरीको पिना प्रयोग गरी नुहाउँछन् । नुहाइसकेपछि तोरीको पिना घिरौँलाको पातमा राखेर खोलामा बगाउने चलन छ । चढाएको तेल आफ्ना सन्तानलाई पनि लगाइदिने चलन छ ।
व्रतालुहरूले बिहीबार आफ्नो नजिकको पोखरी, तलाउ, नदी लगायतमा स्नान गरी जितमाहनको कथा सुनेर व्रतको शुभारम्भ गरेका छन् ।
सन्तानको दीर्घायुको लागि गरिने यो व्रतमा व्रतालुहरू उपवास बस्ने गर्छन् । उपवासका बेला व्रतालुहरूले थुक पनि निल्न नहुने मान्यता छ । मिथिलाञ्चलमा मनाइने व्रतमध्ये जितिया व्रतलाई पवित्र व्रतको रूपमा मानिन्छ ।
जितीया पर्वको अवसरमा सुनसरीको पालकिाहरुमा भोली सार्वजानिक बिदा दिएको छ ।
